Judy - 第十二篇：優雅落台

第十二篇：優雅落台

2004年1月17日(星期六)早上， 天氣寒冷。 kin起身後如常要餵mama食早餐跟住吃藥。但mama唔肯食野，這情況很反常，因為就算mama食野困難，佢都好努力去食。當時mama個樣好沒精打彩。 kin跟佢講" 妹呀！ 妳重咩唔食野呀！擒日妳重食晒成個cheese cake架！"Mama佢始終唔肯食。 kin當其時心一冷，跟住就返工。下午放工，kin就立刻返屋企再嘗試餵mama食野，佢都唔食。晚上阿may返黎整左D美食比佢，但佢始終都冇食野，佢地只有用葡萄糖加水比mama飲。 Mama佢要飲好多水。為了振奮佢既精神，佢地同mama講"Judy食啦，我地聽日重要去街街架。"

當晚，mama開始好倦好倦，整日都訓係佢自己張床上，又唔肯食野。

1月18日(星期日)早上，佢地覺得mama好似發燒，於是去SPCA睇急症。醫生話因為D癌細胞己經擴散到頸既淋巴位，淋巴己經漲晒，因此令到mama發燒，而且重燒到40.9度。醫生話可以同mama打退燒針試下退燒，但通常咁既情況D狗仔過兩日又會再發燒，咁樣D狗仔會好辛苦，醫生提議留低mama係醫院留醫觀察，但kin唔想留低mama，一來mama從來都未離開過屋企一晚，佢怕mama見唔到我地會好驚。二來阿kin一定要留mama係身邊，因為唔知mama跟住既情況會係點。 kin寧願陪mama多些。於是kin叫醫生幫mama打退燒針。醫生話其實mama既精神己經好"謝"啦，如果第二日都重係咁，就要有心理準備，唔好再比mama辛苦啦。 臨走時醫生重同佢地講mama已經好叻，可以撐到今時。又話對唔住，幫唔到佢地mud野。在回程既的士上，kin抱住mama柔弱既身軀同mama講：" 我地依加去街街呀！"Mama跟住慢慢抬起個頭仔望向窗外一下，很快又垂下頭。

返到屋企，可能係藥力既關係，mama既精神好左小許，D燒退左，但身体都係好弱。哈，佢聽到樓上有狗吠聲，佢訓係度重走走地音咁吠左兩聲回應，好似講："你唔好嘈住我訓覺！" Mama大部份時間都訓係張床上，間中會起身行去另一處訓，但佢係腳步浮浮咁行，所以佢地會磅住佢行。Mama己經差唔多兩日冇食野，佢只係飲葡萄糖水。阿may用針筒餵佢飲水，佢唔飲，佢要自己行去個水兜度飲，佢望住D水成分鐘先有氣力低頭飲水。

晚上八點幾，Mama起身去尿尿，行到廁所門口，佢因為太弱而前腳不穩就倒下來。於是阿kin抬佢起身。行到廁所上，佢企係度想左好耐，然後先坐低後身尿尿。尿尿完後kin立即抱mama起身，因為mama已經沒有氣力撐起佢自己個身体。kin十分難過。Kin心裏想："Judy妳真係真係好乖呀！妳身体己經咁弱，妳重咁有紀律自己去廁所。Judy妳真係好有性呀！". 九時許，有一件奇怪既事發生。 kin抱住mama訓係梳化，Mama伏在kin心口，kin掃住mama個背。突然mama抬起頭仔向kin左邊望出去，佢既眼神好以望緊一個目標咁。當時只有mama同kin係屋企，kin亦回頭望向mama望既方向，下意識講 ："唔該你唔好帶走Judy丫，唔好帶走佢，佢咁乖！"kin巳經流住眼淚係咁講。 後來kin放番mama落床，不斷咁掃住mama同叫住佢個名。

當晚，mama體溫又開始升高。佢好靜咁訓係張床度休息，婆婆就係旁邊念經比佢聽。阿kin阿may想餵mama食野，點知幫佢轉身時，mama突然叫，D叫聲好似BB仔扭計既聲。佢四隻腳仔慢慢伸直，眼神散渙。阿kin好緊張問："Judy你做乜野呀！" 婆婆話可能mama要走了。於是所有屋企人都坐在mama身邊陪佢。Mama既呼吸變得很急促，佢巳經冇力旭動，每隔半小時就用叫聲示意我地同佢轉身。Mama掙扎到第日早上，阿may在佢耳邊講：" Judy你走la，你會去到一個好自由既地方，你可以自由咁跑，唔會有人鎖住你架！"

阿kin想抱住mama，等佢可以舒服D，點知抱起時mama就失禁。佢地放佢落床幫佢清理patpat，佢就AuAuAu咁叫表示不滿有人攪佢patpat。到了早上11點幾，Mama叫得越黎越密，阿kin覺得係時候要放手，唔想mama繼續辛苦掙扎落去，決定帶mama去訓覺。於是阿kin將mama放係個布狗兜度抱佢出門。公公婆婆就在門口同mama話別。

當時個天落住毛毛細雨，天寒地冷，但係冷唔過佢地既心情。當阿kin阿may去到診所度巳經喊到出唔到聲，姑娘問野只可答到頭一個字就講唔倒落去。診所其它既人都靜靜咁望住mama。徐醫生見到佢地都知事情嚴重，佢檢查mama後，好凝重咁同佢地講：" 唔好再比Judy捱喇！ 比佢優雅落台吧！"於是阿kin、阿may，indy逐個走近mama在佢耳邊話別："Judy, 好多謝妳比左咁多快樂我地，再見啦Judy！"

2004年1月19日(年廿八) 下午12時50分，我Black Jack既mama，我們的寵兒Judy就離開了，終年十二歲。

2004年1月21日(年三十晚)，mama的樣貌仍然很美麗，她就跟她喜愛的食物一起化為灰嬧了。

再見mama！再見Judy！ We love you forever！